Ismaaciil Cumar Geelle oo markii 5-aad ku guulaystay Madaxweynaha dalka Jabuuti.

Madaxweynaha Jabuuti Ismaaciil Cumar Geelle ayaa markii shanaad ku guuleysatay xilka madaxweynanimo ee wadanka Jabuuti kaddib markii uu helay 98.41% dadkii codeeyay.

Waxaa natiijada doorashada ku dhawaaqay Wasiirka Arrimaha Gudaha Jabuuti Muumin Axmed Sheekh sida ay ku waramayaan Wariyeyaal ku suga xarunta ugu weyn ee tirinta codadka ee magaalada Jabuuti.

Hadal kooban oo uu shalay jeediyay Madaxweyne Geelle, kaddib markii uu dhiibtay codkiisa ayuu sheegay inay doorashadu ay si nabad ah ku dhacday, isla markaana uu sugayo natiijada doorashada.

Madaxweyne Geelle, waxaa la tartamay ganacasade Zakariye Ismaaciil Faarax oo 57-jir ah, wuxuuna helay 1.59% tirada guud ee doorashadan. Zakariye oo ah shakhsi ku cusub siyaasadda Jabuuti ayaa musharraxnimadiisa baraha bulshada ku shaaciyay bishii Janaayo ee sanadkan.